დავით ჩანქსელიანი

დავით ჩანქსელიანი არის გარემოსდაცვითი მმართველი და იურისტი, მრავალწლიანი პროფესიული გამოცდილებით საჯარო და მუნიციპალურ სექტორებში, განსაკუთრებით ნარჩენების მართვისა და გარემოსდაცვითი რეგულაციების მიმართულებით.

მას გავლილი აქვს არაერთი საერთაშორისო ტრენინგი და სასწავლო პროგრამა გარემოსდაცვითი პოლიტიკის, ნარჩენების გადამუშავების და მართვის, რისკების შეფასების, მწარმოებლის გაფართოებული ვალდებულების მიმართულებით (მათ შორის აშშ-ში, შვედეთსა და ჩინეთში).

პროფესიული საქმიანობის განმავლობაში დავითი იკავებდა სხვადასხვა მნიშვნელოვან პოზიციას სასამართლო სისტემაში, ადგილობრივ თვითმმართველობაში და მუნიციპალურ სამსახურში. 2015 წლიდან მუშაობდა შპს „თბილსერვის ჯგუფში“ გარემოსდაცვით მმართველად, პარალელურად კი იკავებდა იურიდიული სამსახურის უფროსისა და შემდგომში სამართლებრივი უზრუნველყოფისა და ნარჩენების მართვის დეპარტამენტის ხელმძღვანელის პოზიციებს.

დავითი აქტიურად იყო ჩართული თბილისის ნარჩენების მართვის სისტემის განვითარებისა და გაუმჯობესების პროცესში. იგი მონაწილეობდა დასუფთავების ტარიფებისა და მოსაკრებლების რეგულირების მექანიზმების შემუშავებაში, ასევე, მონაწილეობდა საქართველოს კანონის „ნარჩენების მართვის კოდექსის“ პროექტის შექმნის პროცესში და სხვა საკანონმდებლო აქტების განვითარებაში.

მას მიღებული აქვს იურიდიული განათლება ივანე ჯავახიშვილის სახელობის თბილისის სახელმწიფო უნივერსიტეტში, ხოლო შემდგომში მიღებული აქვს აკადემიური ხარისხი ეკოლოგიისა და გარემოს დაცვის მიმართულებით. მისი კვლევა შეეხება საქართველოს გარემოსდაცვითი კანონმდებლობის ჰარმონიზაციას საერთაშორისო გარემოსდაცვით კონვენციებთან, მათ შორის ბაზელის, როტერდამისა და სტოკჰოლმის კონვენციებთან.

არის რამდენიმე სამეცნიერო ნაშრომის ავტორი, რომლებიც ეხება ნარჩენების მართვის კანონმდებლობას და ინსტიტუციებს და ქიმიური ნივთიერებების საერთაშორისო მართვის საკითხებს.

ამჟამად, დავით ჩანქსელიანი წარმოადგენს ა(ა)იპ „მწარმოებლის გაფართოებული ვალდებულების ასოციაციის“ მრჩეველს და აქტიურად მუშაობს გარემოსდაცვითი მმართველობის, ნარჩენების მართვისა და რეგულაციების გაუმჯობესების მიმართულებით.

ფლობს ქართულ, რუსულ და ინგლისურ ენებს.